انتشر في الاشهر الماضية احد تطبيقات التواصل والتي اعتبرها اليوم أفضل “أداة” للتواصل في وقتنا الحالي على الهواتف الذكية تطبيق الواتس أب Whatsapp هو تطبيق متوفر على الآي فون والبلاك بيري والاندرويد وحتى النوكيا ! وش فكرة التطبيق ؟ بكل بساطة التطبيق عبارة عن برنامج دردشة او خلونا نقول ماسنجر مثل مايقولون البعض ولكن يميزه عن الباقي سهولته وقابلية استخدامة وفكرته الرائعة في طريقة اضافة الاشخاص فيه اول ما تثبت التطبيق راح يطلب رقم جوالك تحط رقم جوالك وبعد ثواني يرسلك رسالة نصية SMS فيها رمز التفعيل وتحطه ويتفعل الواتس أب على جوالك - اوكي ثبته بس كيف اضيف الاشخاص عليه ؟ فكرته في الاضافة هي كالتالي : أي شخص انت حافظ رقمه في الأسماء عندك على جوالك وعنده نفس التطبيق راح يظهرلك في البرنامج ومن خلاله تقدر تسولف معاه نصياً وتقدر ترسل صورة او فيديو او حتى تسجل صوتك وترسله ايضاً ! - طيب بضيف ناس جدد كيف ؟ بكل بساطة اخذ رقم جواله واحفظه بالاسماء وراح يطلعلك بالواتس أب اذا هو عنده التطبيق، وهذا الي يميزه انه مايطلعلك اشخاص من العدم كلهم ربعك والعايله الكريمه الي مسجل ارقامهم في جوالك - وش فيه مميزات بعد ؟ فيه مميزات اخرى ومنها البرودكاست وهي انك تحدد اشخاص تبي ترسلهم نفس الرسالة بضغطه وحده فقط، ممكن تنسخ قصيدة او تبي تعزمهم على مناسبة او ….الخ وبضغطه ترسلها لهم كلهم وفيه ميزة ثانية ايضاً وهي المجموعات او الجروبات بحيث انك تفتح جروم (غرفة محادثة) وتضيف فيها الي تبي وتسولفون مع بعض بنفس اللحظة - طيب وش استفدت الحين ؟ استفدت انك وفرت قيمة كل رسالة نصية SMS تدفع عليها ٢٥ هلله في كل ٧٠ حرف و٥٠ هلله لكل صورة ترسلها وسائط يعني كل الرسائل صارت ببلاش طبعا التطبيق يعمل على الواي فاي او الجيل الثالث اذا انت مفعل باقة من مقدم الخدمة التطبيق متوفر لمستخدمي الآي فون ب٩٩ سنت في متجر التطبيقات (وانصحكم تشترونه وتخلون سواليف الانستالوس لان دايم تحديثات هالتطبيق بشكل خاص مهمه جدا وراح تخسرها ذا نزلته عن طريق الانستالوس) اما البلاك بيري والنوكيا والاندرويد فهو مجاني بالكامل، لكن راح تدفع ٢ دولار كل سنة عشان تشغل الخدمة مره ثانية تقدر تحمله عبر توجهك من متصفح جوالك الى www.whatsapp.com