للأمانة ما أعرف معلومات كثيرة عن المطعم لكن سمعت كثير شباب يتكلمون عن جودة البرجر الي يقدمها مما جعلني افكر بتجربته في وقت العشاء، خاصة ان والدتي العزيزة ليست في البيت ولا يوجد في البيت غيري انا وولد خالي اللطيف. المطعم الي زرته هو فرع حي غرناطة وأعتقد توه فاتح من شهر تقريباً وهو يقع مع تقاطع طريق الدمام السريع مع خالد بن الوليد بتلقاه جمب محل درعه وجمبه اكثر من مطعم ايضاً. اول ما دخلنا المطعم على الساعة 9 ونص تقريباً وكان شبه فاضي والطاولات كثيرة والمكان شبه صغير وهالشيء جداً مزعج لدرجة ان سواليفك وانت تجلس يسمعها كل الي حولك هههه مدري عاد يمكن الأحساس هذا بس معي انا لكن احسه وسيع وفاضي جداً (يعطي صدى) وبس طاولات. قائمة الوجبات صغيرة ومافيها أي تنوع يذكر والي موجود على القائمة : 2 برجر دجاج + بطاطس + مشروب بـ16 ريال (المشروبات هي مقدمة من كاكا كولا وتاخذها بنفسك من الثلاجة بعد ما تستلم وجبتك) 2 برجر لحم + بطاطس + مشروب بـ16 ريال  2 برجر لحم مع مشروم + بطاطس + مشروب بـ18 ريال نوعين مختلفين من السلطة وجميعهم بـ8 ريال  بس هذي الأشياء الي موجودة وهو نوعاً ما جميلة لأنه يقدملك الاشياء الاساسية فقط وما يخليك تتحير في الطلب بس نظرة وحده وعلى السريع تختار طلبك. والأسعار ممتازة جداً مقارنة بباقي المطاعم (برجر كنج وصلت اغلب وجباته الرئيسية لسعر 22 ريال ! ) مما يجعل الأسعار ممتازة كما ذكرت رحت جلست على الطاولة مع ولد عمي العزيز وعجبني تصميم الطاولات والكراسي، جميل جداً كيف ان الكراسي اذا جمعتها تحت الطاوله تصير مجسم واحد (ما صورتها لكن تصميمها جميل جداً) بس غير مريحة حبتين، ومع أن مافيه غير 3 اشخاص غيرنا بالمطعم لكن طولوا، اخذ الطلب نص ساعة الى شويء. وبعدها جاء العامل ومعاه الوجبات وكاتشب ومايونيز، وطبعاً لأول مره اجرب المطعم انصدمت من صغر حجم البرجر الصغير وقعدنا نطالع بعض ونضحك، بس الحق ينقال كان البرجر سميك شويء، سمينا بالله وأكلنا وطعم البرجر كان أكثر من رائع ولين في المضغ لدرجة ان ولد عمي العزيز يقول “والله ياهو ملعوب علينا ببرجر ماكونالدز” هههه كان رهيب صراحة ولكن لاحظت أن خبز البرجر كان حبتين يابس خاصة السفلى، اما البطاطس كانت رائعة وتشابه بحد كبير طعم تلك التي يقدمها ماكدزنالدز. بعد الأنتهاء من أكل قطعتين البرجر احسست بالشبع رغم صغره المضحك الى انه مشبع بشكل كبير وطعمه ومذاقه رائع (واعتقد هذا الي يميزه ولا ؟) وحتى لو ما شبعتك تقدر تطلب البرجر لحاله بـ5 ريال فقط !

التقيم النهائي : البرجر : برجر اللحم لذيذ جداً صحيح صغير لكن كبير بالطعم وتقدر تطلبه مشوي لو تبغى  الخبز : الخبز كان شويء صلب ويابس خاصة الخبز الي تحت كان صعب المضغ شويء البطاطس : ممتاز وماعليه كلام 

هذا واحدة من تقيماتي الي راح تكون على سلسلة قادمة بأذن الله للمطاعم الجديدة الي راح ازورها. وبإمكانك المشاركة بكتابة تتويتات خاصة بالمطاعم التي تستحق التجربة في مدينة الرياض من خلال الهاش-تاق #RiyadhRestaurants على تويتر.